प्रहरीमाथि कास्की प्रहरी प्रमुख अर्यालको गम्भीर आरोप, भने–‘संगठनमा ७२ हजारमध्ये ६० हजार प्रहरी विल्लादार’

गोल्डेन न्यूज संवाददाता

जिल्ला प्रहरी कार्यालय कास्कीका प्रमुख प्रहरी उपरीक्षक घनश्याम अर्यालले प्रहरीको कार्यशैली आफैलाई चित्त नबुझेको बताएका छन् । एसपी अर्यालले आफू मातहतमा रहेको प्रहरीको काम कार्वाहीमा आफै असन्तुष्ट रहेको बताए । वडा प्रहरी कार्यालय रामबजारको समन्वयमा जिल्ला प्रहरी कार्यालय कास्कीले मंगलवार गरेको नागरिक सुनुवाई कार्यक्रममा उनले प्रहरीको कार्यशैली सन्तोषजनक नरहेको भन्दै सुधारको खाचो औंल्याए। उनले भने–‘प्रहरीको काम कार्वाहीमा म आफै सन्तुष्ट छैन तर सुधार भने हुँदै गएको छ । उनले प्रहरीको काम कार्वाही सन्तोषजनक नहुनुमा तत्लो तहका प्रहरी कर्मचारीलाई दोष लगाए । झण्डै ७२ हजारको संख्यामा रहेको प्रहरी संगठनमा झण्डै ६० हजार विल्लादार तथा प्रहरी जवान रहेको भन्दै उनले कार्यक्षेत्रमा खटिएर प्रत्यक्ष घुलमिल हुने तल्लोतहका प्रहरीले नागरिकको मन जित्नेगरी काम गर्न नसकेको आरोप लगाए । अन्यत्र केहि नभएपछि प्रहरीमा भएपनि जागिर खान आउने तल्लो तहका प्रहरीका कारण प्रहरी सेवालाई गुणस्तरीय बनाउन नसकिएको उनको संकेत छ ।
 

पछिल्लो समय तत्लो तहका प्रहरी कर्मचारीको दक्षता, क्षमता अभिवृद्धिका लागि विभिन्न तालिम सञ्चालन गरिएकाले उनीहरुको कार्यशैलीमा सुधार आउँदै गरेको अर्यालले बताए । प्रहरी प्रति नागरिकका गुनासोमा समर्थन जनाउँदै उनले प्रहरी कर्मचारीको कार्यशैलीमा सुधारको खाँचो औल्याए । कार्यसम्पादनका क्रममा नागरिकसँग प्रत्यक्ष घुलमिल हुने तल्लो तहका कर्मचारीलाई क्षमतावान बनाए प्रहरी संगठनको काम कार्वाही पनि गुणस्तरीय हुने उनको विश्वास छ ।
कार्यक्रममा बोल्ने केहि नगरवासीले प्रहरीले गर्ने ब्यवहार प्रति प्रश्न उठाएपछि जवाफ दिने क्रममा एसपी अर्यालले प्रहरीको कमजोरी स्वीकारेका हुन् ।

मुस्कान सहितको प्रहरी हुँदै प्रहरी मेरो साथी सम्मको स्किम ल्याएको नेपाल प्रहरीमा अझैपनि केहि प्रहरी कर्मचारीको ब्यवहार नागरिकमैत्री हुन नसकेको नगरवासीको गुनासो छ । पोखरा औद्योगिक क्षेत्रकी गोमा रायमाझीले प्रहरीबाट अझैपनि नागरिकलाई दुःख दिने काम भएको बताइन् । प्रहरीले नागरिकसँग बोल्ने बोलीचालीमा पनि मिठास नहुने तथा निकै रुखो स्वभावमा प्रस्तुत हुने प्रवृति अझै कायम रहेको उनले बताइन् । पोखरा–१५ का प्रकाश पौडेलले नागरिक सँगको सामिप्यता बढाउन मुस्कान सहितको प्रहरी, प्रहरी मेरो साथी कार्यक्रम ल्याएपनि ब्यवहारमा लागू नभएको बताए । कार्यक्रममा उपस्थित अधिकांशले ट्राफिक ब्यवस्थापनको विषयमा प्रश्न उठाएका थिए । ट्राफिक प्रहरीकै अगाडि सवारी नियम मिच्ने प्रवृत्ति बढेको, जेब्रा क्रसिङबाट बाटो काट्दा पनि पैदलयात्रुले जोखिम मोल्नुपरेको, सवारी चालकले जेब्रा क्रसिङको नियम पालना नगरेको, जथाभावी गाडी रोक्ने तथा पार्किङ अस्तब्यस्त भएको लगायतका विषय कार्यक्रममा उठान भएको थियो । कतिपयले पृथ्वीचोक स्थित आइल्याण्ड भत्काएर बाटो फराकिलो बनाउनुपर्ने आवश्यकता औल्याएका थिए । पोखरा–१० रामबजारका लोकेन्द्र कुमार चाम्लिङ राईले सवारी ब्यवस्थापनमा विशेष ध्यान दिन आग्रह गरे । सवारी नियम उल्लङ्घनको घटना बढीरहेको भन्दै उनले चालक सचेतना कार्यक्रम सञ्चालन गर्नुपर्नेमा जोड दिए ।  कार्यक्रमको समन्वय वडा प्रहरी कार्यालय रामबजारका प्रमुख प्रहरी निरीक्षक वेद प्रकाश जोशीले गरेका थिए ।