पूर्वगृहमन्त्री सवार कार दुर्घटना,तीनको शव भेटियो

गोल्डेन न्यूज संवाददाता

पूर्वगृहमन्त्री माधव घिमिरे सवार कार त्रिशुली नदीमा खसेको छ। नेपाल सरकारका पूर्व मुख्यसचिव समेत रहेका घिमिरे सवार कारमा सात जना रहेको चितवन प्रहरीले जनाएको छ । चितवनको दारेचोक स्थित घोप्टेभिरबाट त्रिशुलीमा खसेको कारमा सवार सात मध्ये तिन जनाको शव भेटिएको चितवन प्रहरीले जानकारी दिएको छ । कारमा पूर्व गृहमन्त्री माधव घिमीरे सहित उनका दुई भाईहरू प्रकाशचन्द्र घिमिरे र मोहन घिमिरे सवार थिए । दुर्घटनामा परी प्रहरी असई आरसी कार्की, पूर्व गृहमन्त्री घिमिरेकी आमा चैतन्य कुमारी घिमिरे तथा आफन्त नारायणप्रसाद काफ्लेको मृत्यु भएको विपत ब्यवस्थापन तालिम केन्द्र कुरिनटारका प्रवक्ता गणेशबहादुर थापाले जानकारी दिएका छन् । त्यस्तै चालक  विष्णु राई घाइते भएका छन् । उनलाई उपचारका लागि भरतपुर लगिएको बताइएको छ । मुग्लिनबाट काठमाडौं जाँदै गरेको बा ९ च १५३१ नम्वरको कार आइतबार साँझ सडकबाट तल त्रिशुली नदीमा खसेको हो । यता, प्रधानमन्त्री प्रचण्डले पनि घिमिरे सवार कार दुर्घटना भएको पुष्टि गर्दै आफू समाचारले स्तब्ध भएको बताएका छन् । शीघ्र खोजीका लागि प्रशासनलाई उनले निर्देशन समेत दिएका छन्।
चालकको बयान ः
पूर्वगृहमन्त्री माधवप्रसाद घिमिरे आफ्नी ८० वर्षीया आमा चैत्यकुमारीलाई मुक्तिनाथ धामको तीर्थाटन गराएर आइतबार काठमाडौं फर्किँदै थिए। हिन्दू धर्माबलम्बीहरुका प्रमुख चारधाम मध्ये मुस्ताङको मुक्तिनाथ एक हो । स्कारपियो जीपमा आमा र आफन्त लिएर गएका घिमिरेसँग गाडी चालक पनि थिए ।
त्रिशुलीमा खसेको जीपबाट उछिट्टिर बाँच्न सफल भएका घिमिरेका चालक बिष्णु राईले नै प्रहरीलाई सबैभन्दा पहिले दुर्घटनाको खबर गरेका थिए । उनले भने–‘ दमौलीदेखि गाडी उहाँले चलाउनुभएको थियो ।’ दमौलीमा केहीबेर रोकिएपछि घिमिरेले चालक राईलाई भनेका थिए–तिमी थाकेका छौ, केबलकारसम्म म चलाउँछु, अनि तिमी चलाउनू । तर, केबलकार अर्थात कुरिनटार नपुग्दै गाडी त्रिशुलीमा खस्यो ।  घिमिरेको भनाइ सम्झिँदै चालक राईले भने–केबलकार चढ्ने ठाउँ आउन एक÷दुई किलोमिटर छ भने जस्तो लाग्छ, त्यसपछि गाडी कसरी उछिटिएर गयो केही पनि थाहा पाइँन ।