कास्की अदालतमा दोभाषे सुचिकृत

राजाराम पोडेल÷गोल्डेन न्यूज

कास्की जिल्ला अदालतमा दोभाषे सुचिकृत गरिएको छ । अदालतको कार्वाहीमा दोभाषे प्रयोग सम्बन्धि निर्दैशिका २०७२ बमोजिम दोभाषे सुचिकृत गरिएको कास्की जिल्ला अदालतका स्रेस्तेदार कृष्ण प्रसाद नेपालले जानकारी दिए । नेपाली भाषा राम्रोसँग बोल्न र बुझ्न नसक्ने मुद्दाका पक्ष वा अदालतको आदेशले झिकाइएका अन्य कुनै व्यक्त्ति र अदालतले सहुलियत दिएका साक्षी समेतका लागि दोभाषेको व्यवस्था गर्नका लागि दोभाषे सुचिकृत गरिएको उनले जनाए । कास्की जिल्ला अदालतले गुरुङ्ग, नेवारी, मगर, अग्रेजी, हिन्दि, चाइनिज, जापानिज, फे्रन्च, जर्मनी, स्पेनिस, अरबिएन र रसियन भाषा मौखिक रुपमा उल्था गर्ने, लेख्न र बोल्न जान्ने तथा सरकारी कामकाजको भाषा राम्रोसँग बोल्न र लेख्न जान्ने व्यक्तिलाई दोभाषेको रुपमा सुचिकृत हुन निवेदन दिन गत फागुन ४ गते १५ दिने सूचना प्रकाशित गरेको थियो । उक्त्त सूचना बमोजिम परेका निवेदनमध्ये पोखरा बाटुलेचौरका लेखराज रेग्मी अंग्रेजी, फ्रेन्च, हिन्दी भाषाका लागि सुचिकृत भएका छन् । उनी पाकीस्तानी, उर्दु, पञ्जाबी, इटालियन भाषामा समेत पोख्त छन् । यसैगरी पोखरा ८ का चुन बहादुर राना अंग्रेजी भाषाका लागि र भरतपोखरीका बद्रीनाथ आचार्य अग्रेजि तथा हिन्दि भाषाका लागि सुचिकृत भएको अदालतका श्रेस्तेदार नेपाल बताउँछन् । सूचना प्रकाशित गरेर सम्बन्धित ठाउँमा जानकारी गराउदाँ समेत गुरुङ्ग, नेवारी, मगर भाषाको लागि कसैको निवेदन परेन । चाइनिज, जापानिज, जर्मनी, स्पेनिस, अरबियन र रसियन भाषामा सुचिकृत हुनका लागि निवेदन दिने समेत कोहि नभएको श्रेस्तेदार नेपालले बताए । दोभाषे सेवा प्रदान गर्ने दोभाषेहरुले सेवा प्रदान गरेबापत स्वदेशी भाषाको हकमा प्रतिदिन एक हजार रुपैयाँ र विदेशी भाषाको हकमा प्रतिदिन दुई हजार रुपैयाँ पारिश्रमीक पाउने उनले जनाए । अदालतको कारवाहीमा दोभाषे सेवाको प्रयोग सम्बन्धि निर्देशिका २०७२ सर्वोच्च अदालतको पुर्ण बैठकबाट गत पौष २२ गते पारित भएको थियो ।