लेकसिटी अस्पतालमा बिरामीको मृत्यु, ‘रगत दिंदै गर्दा बत्ति गएर मेशिनले काम नगरेपछि मृत्यु’

गोल्डेन न्यूज संवाददाता

पोखराको बगालेटोलस्थित रहेको लेकसिटी हस्पिटल एण्ड क्रिटिकल केयर प्रालिमा डायलसिस गराउने क्रममा एक जनाको ज्यान गएको छ । बिहीवार दिउसो डायलसिस गराउँदै गरेका ५० बर्षीय ध्वजवहादुर थापा मगरको ज्यान गएको हो । काभ्रे जिल्ला स्थायी घर भई पोखरा १७ हिमालीटोल बस्दै आएका थापामगर श्रीमती झुपी मायासँगै डायलसिसका लागि दिउसो हस्पिटल आएका थिए। डायलसिसको क्रममा दिउसो करिब २ बजे उनको ज्यान गएको हो । मृतककी श्रीमती झुपीमायाले चिकित्सक र अस्पतालको लापर्वाहीले आफ्नो श्रीमानको ज्यान गएको बताइन् । डायलसिसको क्रममा रगत दिंदै गर्दा बत्ती गएको र मेसिनले काम नगर्दा ज्यान गएको उनले बताइन् । आफूले हेर्दा–हेर्दै श्रीमानको ज्यान गएको उनले जानकारी दिईन् । तर डायलसिसमा संलग्न चिकित्सक अभिषेक मास्केले विद्युत आपूर्ति अभावले नभई तत्काल मुटुमा समस्या आएकाले उनको मृत्यु भएको बताए । ‘डायलसिस गराउने बिरामीको अवस्था पहिल्यै क्रिटिकल हुन्छ,’ उनले भने–‘मेजर हट अट्याकको कारण मुटुमै केहि भएर मृत्यु भएको हो ।’ तत्काल विद्युत आपूर्ति बन्द भएपनि मेसिनको ब्याकअपले काम गर्ने र केहि प्रभाव नपर्ने उनको दावी छ । थापा मगरसँगै अर्का एक जनाले सफल डायलसिस गराएर गएको चिकित्सकले बताए । ‘मैले हेरेर बाहिर निस्किएको पाँच मिनेटमै श्रीमती चिच्याएपछि भित्र जाँदा मुत्यु भैसकेको थियो’–डा. मास्केको भने । डायलसिसको क्रममा सडेन डेथको सम्भाबना बढी हुने उनले बताए । मृतक थापामगरका तीन छोरी र श्रीमति छन् । पोखराको लिगेसी होटलमा कुक काम गर्ने उनले तीन महिनादेखि नियमित डायलसिस गराउँदै आएका थिए । सुरुमा मनिपाल शिक्षण अस्पतालमा डायलसिस गरेपनि बिरामीको भिड अत्याधिक भएकाले लेकसिटीमा आउन थालेका थिए । पाँचौ पटकसम्म सफल डायलसिस गराएका उनको छैटांै पटक मृत्यु भएको हो । अस्पताल प्रशासनका अनुसार लेकसिटी हस्पिटलमा उनी सहित २० जनाले नियमित डायलसिस गराउँदै आएका थिए । उपचारका क्रममा थापा मगरको मृत्यु भएपनि सम्भावित घटना हुन नदिन अस्पताल परिसर र वरपरको सुरक्षा व्यवस्था कडा बनाइएको थियो । सुरक्षाका लागि बाक्लो सुरक्षाकर्मी खटाइएको थियो ।