कमल खत्री
उत्तरी पर्यटकीय दाना गाविस–२ काभ्रेमा रहेको नौमती बाजा ढुङ्गा ओझेलमा परेको छ । अग्लो पहाडमा नौमती बाजाका आकृति रहेको उक्त स्थानलाई प्रचार–प्रसार गर्न सकेमा पर्यटक भित्र्याउन सक्ने सम्भावना रहेको स्थानीय समाजसेवी सुनबहादुर विश्वकर्माले जानकारी दिए । उनका अनुसार दुईवटा दमाहा, एउटा ढोलक र एउटा ट्याम्को बाजाको आकृति रहेको ठाउँमा कुनै वस्तुले हान्दा आकृति अनुसारको आवाज निस्कने गर्छ । ‘‘पहाडमा रहेका आकृति अनुसारको आवाज निस्कनु आफँैमा नौलो हो, पहाडमा नौमती बाजाका सनही, नरसिंहा, कर्नाल बाजाको समेत आकृति देखिन्छ, यस क्षेत्रका बारेमा प्रचारप्रसार गर्नका लागि सक्रिय रहनुभएका विश्वकर्माले भने । ’’ यस क्षेत्रको प्रचारप्रसार गरी पर्यटन प्रवद्र्धनको लागि काभ्रेमा घरबास सञ्चालन गर्ने तयारी भइरहेको छ । अभियानकर्ताले जिल्लास्थित उद्योग वाणिज्य सङ्घ तथा जिविस र गाविससँग समन्वय गरी घरबास सञ्चालन गर्ने तयारी गरेको विश्वकर्माले बताए । नौमती बाजाको आवाज निस्कने ढुङ्गा रहेको उक्त स्थानका बारेमा प्रचारप्रसारका लागि अहिले स्थानीयवासीले अभियान चलाएका छन् । अभियानका क्रममा जिल्लास्थित सरोकारवालालाई उक्त स्थानका बारेमा जानकारी गराउन र पर्यटन प्रवद्र्धन गराउन पहल गरिने स्थानीय शिक्षक श्याम पुनले बताए । बेनी–जोमसोम सडकखण्ड अन्तर्गत दानामा रहेको आकर्षक रुप्से झरना र विश्वकै गहिरो अन्ध गल्छीको शिरमा रहेको नौमती बाजा ढुङ्गा परिसरमा आवश्यक पूर्वाधार निर्माण र प्रचार–प्रसार गर्न सकेमा पर्यटक भित्र्याउन सकिने (नेकपा एमाले) दानाका उपाध्यक्ष हस्तबहादुर पुन बताउछन् । काभ्रे गाउँ नजिकै निकै अनौठो स्थानका रुपमा रहेको नौमती बाजा ढुङ्गाको बारेमा स्थानीयवासीदेखि जिल्लास्तरका राजनीतिक दलका प्रतिनिधिले समेत चासो दिनुपर्ने उनको भनाइ छ । अग्लो स्थानमा अनौठो दृष्य र आवाज निस्कने सो ढुङ्गाका बारेमा सबै क्षेत्रमा प्रचार–प्रसारका लागि स्थानीयवासी लागिपरेको रुप्से सङ्गम युवा क्लबका अध्यक्ष लालबहादुर पुन बताउछन् ।
सयौँ वर्ष अगाडि रुप्से झरनामा रहेका भूमे देवताले स्थानीय नौमती बाजा टोलीका बाजालाई पहाडमा रुपान्तरित आकृतिको रुप बनाइदिएको किंबदन्ती छ । अहिले पनि लामो खडेरीका समयमा उक्त स्थानमा पूजा गरेमा पानी पर्ने गरेको स्थानीयवासी बूढापाका बताउँछन् । रासस
Post a Comment