भूपिको ८०औं जन्मजयन्तीमा विशेष कवि गोष्ठी

गोल्डेन न्यूज संवाददाता

कवि भूपी शेरचनको जन्म जयन्तीको अवसरमा पोखरामा विशेष कवि गोष्ठी हुने भएको छ । पोखरेली युवा सांस्कृतिक परिवारले उनको ८० औं जन्म जयन्तीको अवसरमा पुस ४ गते विशेष कवि गोष्ठी गर्ने भएको हो । उनको जन्म भने वि सं १९९२ साल पुस १० गते मुस्ताङ जिल्लाको थाक टुकुचेमा भएको थियो । भूपी शेरचनको सम्मानमा विशेष कवि गोष्ठीको आयोजना गरेका हौं’, परिवारका अध्यक्ष सुरेश रानाभाटले भने, ‘गोष्ठीमा झण्डै २० जना कविले कविता वाचन गर्नेछन् ।’ कवि भूपी शेरचन यो युगका कवि भएकाले उनको सम्मान र नयाँ पुस्तामा उनको बारेमा जानकारी गराउने खालका कार्यक्रम आवश्यक रहेको कवि तथा परिवारका सल्लाहकार तीर्थ श्रेष्ठले बताए । गोष्ठीमा विशेष रुपमा उनका सहकर्मी तथा उनलाई नजिकबाट चिनेका व्यक्तिहरु पनि उपस्थित भएर उनका सृजनाकर्मका विषयमा जानकारी दिने कार्यक्रम पनि रहेको परिवारले जनाएको छ ।

परिवारले गर्दै आएको समता काव्य सन्धासमेत समावेश गरी हुने गोष्ठीमा उनका केही कविता वाचनसँगै पोखरा तथा आसपासका झण्डै २० जना कविले कविता वाचन गर्ने कार्यक्रम रहेको परिवारका साहित्य संयोजक प्रकास ज्ञवालीले जानकारी दिए । गोष्ठी नयाँ पुरना गरी कविता वाचन गर्ने कविहरुको नाम छनोट भईसकेको र पोखरा उद्योग वाणिज्य संघधको अमृत कक्षमा दिउँसो ३ बजेदेखि गोष्ठी सुरु हुने आयोजकले जानकारी दिएको हो । भूपी जयन्तीकै अवसरमा थकालि सेवा समितिले पनि ११ गते शनिबार विशेष कार्यक्रम राखेको छ ।

उनको नाम भूपेन्द्रमान शेरचन भएपनि नेपाली साहित्य आकाशमा भूपि शेरचनका नामले परिचित छन् । कवि भूपी शेरचनले नयाँ धारको कविताको शैलीलाई विकास गरेका थिए । उनले हिँडेको कविताको बाटो नै अहिले कविता हिँडिरहेको बताइन्छ । सरल र अनुप्रासयुक्त शब्दहरुमार्फत् सामाजिक विकृतिविसंगतिमा प्रहार गर्नु र परिवर्तनको आव्हान गर्नु उनका सिर्जनाका विशेषता हुन् । घुम्ने मेचमाथि अन्धो मान्छे’ उनको सबैभन्दा चर्चित कृति हो । शेरचनका ‘परिवर्तन’ नाटक (२०१०), ‘नयाँ झयाउरे’ गीतिकविता संग्रह (२०१०), ‘निर्झर’ (कविता संग्रह (२०१५), ‘घुम्ने मेचमाथी अन्धो मान्छे’ कवितासंग्रह (२०२५), र पछिल्लो समय २०५७ सालमा शिव रेग्मीको सम्पादनमा ‘भूपि शेरचनका कविताहरू’ –कवितासङ्ग्रह (२०५७) कृति प्रकाशन भएका छन् कवि शेरचनका नयाँ झ्याउरे , निर्झर र घुम्नेमेचमा अन्धोमान्छे कविता संग्रह प्रकाशीत छन । भूपि शेरचनको घुम्ने मेचमाथि अन्धो मान्छे कृति साझा पुरस्कार पाउने पहिलो कृति हो ।