गोल्डेन न्यूज संवाददाता
पश्चिमाञ्चल क्षेत्रीय स्वास्थ्य निर्देशक डा. तारानाथ पौडेलले स्वास्थ्य संग सम्बन्धित संघ–संस्थाका साथै अन्य सबै निकायमा आर्थिक परदर्शिता हुनुपर्नेमा जोड दिएका छन् । सबै संस्थामा आर्थिक पारदर्शिता नभएको भन्दै उनले आर्थिक पारदर्शिताका साथै सेवामूलक र स्वास्थ्य संस्थाहरु बिरामीमुखी हुनुपर्नेमा जोड दिए । पोखराको न्यूरोडमा रहेको युनाइटेड रेफरेन्ट ल्याबोरेटरी (युआरएल) द्वारा संचालित वेवसाइट विमोचन तथा पत्रकार घेटघाट कार्यक्रममा बोल्दै कार्यक्रमका प्रमुख अतिथि समेत रहेका डा. पौडेलले युआरएलले स्वास्थ्य क्षेत्रमा धेरै राम्रो काम गरेको जानकारी आफूले पाएको बताए । उनले सबै जनतामा स्वास्थ्य सेवाको पहुँच नपुगेको भन्दै जुन जनतालाई जस्तो किसिमको स्वास्थ्य सेवा आवश्यक छ सोही अनुरुप उपलव्ध हुनुपर्नेमा जोड दिए । सबै जनताको पहुँमा स्वास्थ्य सेवा पु¥याउने सरकारकोे उद्देश्य रहेको भन्दै उनले निजी अस्पताल तथा संस्थाहरुले सहयोग र सहकार्य गर्नुपर्ने खाँचो औंल्याए । जनताले स्वदेशमै भरपर्दो स्वास्थ्य सेवा पाउन नसक्दा विदेश जानुपरेको अवस्थामा युआरएलले पोखरामै आफ्नो सेवा संचालन गरेर उदाहरणीय काम गरेको उनले स्पष्ट पारे । उनले भने–‘स्वास्थ्यकर्मीहरु स्वास्थ्यकर्मी जस्ता छैनन्, सबैले आ–आफ्नो जिम्मेवारी वहन गरेका छैनन् । यस्तो अवस्थामा युआरएलले थोरै भएपनि जनताको मन र विश्वास जितेर काम गर्ने मैले अपेक्षा गरेको छु ।’ उनले युआरएलले सरकारको नीति र निर्देशनलाई ख्याल र सामाजिक उत्तरदायित्वमा समेत अझ सशक्त भूमिका निर्वाह गर्दै अघि बढ्ने विश्वास व्यक्त गरे ।
कार्यक्रममा जिल्ला जनस्वास्थ्य कार्यालय कास्कीका ल्याव टेक्निसियन अधिकृत राजेन्द्र पाण्डेले युआरएल गरिब जनताको पहुँमा समेत पुग्नुपर्नेमा जोड दिए । उनले युआरएल धेरै महंगो भएको आफूले सुनेको प्रसङ्ग कोट्याउँदै यसअघि जे जस्तो भएपनि गरिब, अशक्त र निमुखा जनताका लागि जस्तो सुकै कदम चालेर अघि बढ्ने विश्वास व्यक्त गरे । युआरएलका अध्यक्ष चेतबहादुर गुरुङले सरकारको नीति र निर्देशनमा अधिनमा रहि जनताको स्वास्थ्य सेवामा सदैव लागिपर्ने प्रतिवद्धता जनाए । उनले भने–‘हामीले सेवा संचालन गरेका छौं । यसमा सामाजिक र मानवीय सेवामा कुनै कमि हुनेछैन ।’ गरिब, अशक्त र निमुखा जनताको स्वास्थ्य सेवामा युआरएलले सानो मन नबनाउने प्रतिबद्धता जनाए ।
युआरएलले २ वर्षमा गरेको कार्य पं्रगति र भावी रणनीति बारे प्रकाश पार्दै प्रबन्ध निर्देशक ठाकुर प्रसाद पन्तले युआरएलबाट करिब ३५ हजार जनताले स्वास्थ्य सेवा पाएको र ३ लाख ५० रगत परीक्षण गरिएको जानकारी दिए । हरेक मानिसले आफ्नो रोग लुकाएरै राख्ने गरेको प्रसङ्ग कोट्याउदै उनले ३५ हजार मानिसको स्वास्थ र रगतको नमूना परीक्षण गर्दा सुगर, थाइराइड र भिटामिन डीको कमि अत्यधिक भएको पाइएको बताए । युआरएलको सेवा देशभरका जनताले पाइरहेको भन्दै प्रवन्ध निर्देशक पन्तले थप सेवा र सुविधाका साथ अघि बढ्ने प्रतिवद्धता जनाए । युआरएलमा गरिएको रगत परीक्षण कहिल्यै र कुनैपनि फेल नभएको स्पष्ट पार्दै काठमाडौंका अस्पतालमा संचालित सेवा भन्दा युआरएलको सेवा २०–३० प्रतिशत सस्तो भएको स्पष्ट पारे । युआरएलमा क्यान्सरका सबै किसिमका परीक्षण हुने जानकारी गराउँदै उनले सेवा र सुविधा थप गरेर गुणस्तरीय सेवा प्रदान गर्न आफूहरु प्रतिवद्ध रहेको बताए । युआरएलको सहयोग र सहकार्यमा पोखरा लगायत आसपासका १३ स्थानमा शिविर संचालन गरि विविध सेवा उपलव्ध गराएको स्पष्ट पारे ।
रेडियो अन्नपूर्णका कार्यकारी अधिकृत दीपेन्द्र श्रेष्ठले युआरएलले जुन जमर्को गरेको छ त्यो हिजो पनि आवश्यक थियो, आजपनि आवश्यक छ र भोलिपनि आवश्यक पर्ने भन्दै युआरएलको जुन चर्चा छ त्यसलाई आगामी दिनमा पनि कामय राखेर अघि बढ्न सुझाव दिए । उनले युआरएलले लिएको नारा र प्रदान गरेको सेवाले सबैतर्फ प्रशंसा पाएको बताए । कार्यक्रममा स्वतन्त्र पत्रकार संघका केन्द्रीय अध्यक्ष कृष्ण प्रसाद बाँस्तोलाले युआरएल स्वास्थ्य क्षेत्रमा प्रतिस्पर्धात्मक रुपमा अघि बढेको भन्दै गुणस्तरीय सेवा उपलव्ध गराउन सदैव प्रतिवद्ध हुनुपर्नेमा जोड दिए । अहिलेको परिवेशमा पोखरामा आयोजना हुने स्वास्थ्य शिविरमा युआरएल बिना अधुरो हुने स्पष्ट पार्दै उनले युआरएलको सेवा संचारकर्मीले पनि पाउनुपर्नेमा जोड दिए । कार्यक्रममा युआरएलका संचालक दिनेशबाबु खड्का, वेवपेज नेपालका प्रवन्ध निर्देशक प्रितमशेन ठकुरी र संचारकर्मी ऋषि खतिवडाले पनि बोलेका थिए । युआरएलद्वारा संचालित वेवसाइटमा युआरएलमा उपलव्ध सेवा, गरेका काम र भूमिकाहरु, संचालक समिति, कर्मचारी र विभिन्न किसिमका न्यूजहरु समावेश गरिएको छ । युआरएलले गर्ने थप सेवाहरुको बारेमा समेत वेवसाइटमार्फत जानकारी गराउँदै अघि बढ्ने निर्देशक पन्तले बताए ।
Post a Comment