१७ औं पोखरा सडक महोत्सव पुसको १३ देखि

गोल्डेन न्यूज संवाददाता

रेष्टुरेण्ट एण्ड बार एशोसिएशन अफ नेपाल (रेवान) पोखराले आयोजना गर्दै आएको पोखरा सडक महोत्सवको १७ औं संस्करण आउँदो पुष १३ देखि १७ गते सम्म हुने भएको छ । रेवान पोखराका अध्यक्ष गोपीबहादुर भट्टराईको अध्यक्षतामा आइतबार बसेको बैठकले १७ औं सडक महोत्सवका लागि समितिका सदस्य दोर्जे लामालाई संयोजकमा चयन समेत गरेको छ । मुन डान्स रेष्टुरेण्टका लामा रेवान पोखराका कार्यसमिति सदस्य हुन् । अंग्रजी नयाँ वर्षको अवसरमा ‘सडकमै खाउँ सडकमै नाचौ सडकमै रमाऔं’ भन्ने मुल नाराका साथ रेवानले यो महोत्सव आयोजना गर्दै आएको छ । ‘देशको असहज परिस्थितीका वाबजुद पनि विगतदेखि गरिदै आएको महोत्सवलाई यसपटक पनि भव्यताका साथ आयोजना गरिने निर्णय गरियो’–अध्यक्ष भट्टराईले भने । भूकम्पपछिको नाकाबन्दीका कारण पर्यटन क्षेत्र नराम्ररी प्रभावित भएको बताउँदै सम्बन्धित निकायलाई यसका बारेमा ध्यानाकर्षण गराइने पनि बैठकले निर्णय गरेको छ ।
 

महोत्सवमा विभिन्न अन्र्तराष्ट्रिय खानाका परिकार, राष्ट्रिय पप् तथा लोक गायक गायिकाको साँगीतिक प्रस्तुति, बाल उद्यान, साँस्कृतिक कार्यक्रम लगायत रहेन छ । आन्तरिक एवं वाह्य पर्यटन प्रवद्र्धन गर्दै समग्र राष्ट्रकै पर्यटन उद्योगमा सहयोग पु¥याउने उद्येश्यका साथ रेवानले यो महोत्सव आयोजना गर्दै आएको छ । महोत्सव सफल पार्न सम्पूर्ण नेपाली दाजुभाई दिदीवहिनिहरुले आ आफ्नों स्थानवाट सहयोग गर्नुहुने विश्वास लिएका छौं–अध्यक्ष भट्टराईले भने ।

व्यापार मेला मंसिर १० गतेदेखि

पोखरा उद्योग वाणिज्य संघले आउँदो मंसिर १० देखि २० गतेसम्म पोखरामा आयोजना गर्ने राष्ट्रिय औद्योगिक व्यापार मेला–२०७२ अनिश्चितकालको लागि पर धकेलिएको छ । संघका अध्यक्ष विन्दुकुमार थापाको अध्यक्षतामा आइतबार बसेको कार्यसमितिको २१ औँ बैठकले मेला अनिश्चितकालको लागि पर सार्ने निर्णय गरेको महासचिव रवीन्द्रबहादुर प्रजुले जानकारी दिए । संघले वर्तमान विषम परिस्थितिका कारण मेला पर सार्नु परेको जनाए पनि सीमामा जारी अवरोध र भारतको अघोषित नाकाबन्दीले सृजना गरेको विषम परिस्थितिलाई ध्यान दिएरै मेला पर धकेलिएको हो । यस अघि लेखनाथ उद्योग वाणिज्य संघले समेत घोषित मेला पर सारेको जनाएको थियो । पोखरा उद्योग वाणिज्य संघका महासचिव प्रजुका अनुसार स्थिति सहज भएपछि मेला आयोजना हुनेछ । मेलाको आगामी मिति लेखनाथ उद्योग वाणिज्य संघसँगको छलफलपछि तय गरिने उनले जनाए । कास्कीमा रहेका दुई उद्योग वाणिज्य संघले यस अघि आपसी समझदारीमा भिन्नाभिन्नै समयमा मेला गर्ने घोषणा गरेका थिए ।