राष्ट्रिय समाचार समितिका ३२ पत्रकारहरुलाई पोखरामा तालिम, समाचारको हरेक पक्षलाई गम्भीरताका साथ लिनुपर्छ–रिजाल

गोल्डेन न्यूज संवाददाता

राष्ट्रिय समाचार समिति
(रासस) को आयोजना एवम् रासस बृहत्तर हित उप–समितिको संयोजनमा शनिबारदेखि पोखरामा दुई दिवसीय समाचार लेखन तालिम सुरु भएको छ । राससको समाचार लेखनमा गुणस्तरीयता कायम गर्ने लक्ष्यका साथ राससअन्तर्गत लुम्बिनी, धवलागिरि र गण्डकी अञ्चलका विभिन्न जिल्ला तथा क्षेत्रमा रही कार्यरत ३२ समाचारदाता एवम् प्रतिनिधिका लागि सो तालिम आयोजना गरिएको हो ।
 

तालिमको उद्घाटन समारोहमा पूर्व सञ्चारमन्त्री डा मीनेन्द्र रिजालले सञ्चारजगत राज्यको महत्वपूर्ण अङ्ग भएको चर्चा गर्दै सञ्चारकर्मीले समाचारको सत्यता, गुणस्तरीयतालगायत हरेक पक्षलाई गम्भीरताका साथ लिनुपर्ने बताए । ‘समाचार लेख्दा समाचारदाताले जिम्मेवारितालाई आत्मसात् गर्नु अपरिहार्य हुन्छ,’ उनले भने–‘समाचारदाताले लोकप्रियताका लागि बढाइचढाइ गर्नुभन्दा वास्तविक समाचार सम्प्रेषणलाई सधैँ उच्च प्राथमिकतामा राख्नुपर्छ ।’ राष्ट्रिय सूचना आयोगका आयुक्त किरण पोखरेलले राससले ठूला र राम्रो सञ्चार माध्यमसँग प्रतिस्पर्धा गर्न सक्ने गरी समाचारको गुणस्तरीयता बढाउनु पर्ने धारणा राखे । राष्ट्रिय समाचार समितिका अध्यक्ष कुलचन्द्र वाग्लेले समाचारदाताको समाचार सम्प्रेषणलाई प्रभावकारी बनाउन तालिम आयोजना गरिएको बताए । ‘पत्रकारिता सत्यताको मुख खोल्ने अभियान हो,’ उनले भने,–‘समाजका सत्य तथ्यलाई सम्प्रेषण गर्नु सञ्चारमाध्यमको प्रमुख दायित्व हो ।’ राजनीतिक स्वतन्त्रतामा मात्र पत्रकारिता फस्टाउने र जीवित रहने उल्लेख गर्दै अध्यक्ष वाग्लेले यो लोकतन्त्रको पहरेदार भएको चर्चा गरे । रासस बृहत्तर हित उपसमितिका संयोजक एवम् रासस सञ्चालक समिति सदस्य गङ्गाधर पराजुलीले कार्यक्षमताको विकास मात्र नभएर समग्र राससको समाचार प्रभावकारी र गुणस्तरीय बनाउन तालिम आयोजना गरिएको बताए । राससका प्रधान सम्पादक राजु शाक्यले राससको समाचार सेवाको गुणस्तरीयता अभिवृद्धिका लागि तालिम उपयोगी हुने धारणा राखे । कास्कीका स्थानीय विकास अधिकारी रामचन्द्र तिवारीले पत्रकारिता आफँैमा एउटा महत्वपूर्ण तर जटिल पेसा भएका कारण जाँगर नचल्नेले यो पेसा अङ्गाल्न नहुने धारणा राखे । पोखरा उपमहानगरपालिकाका वरिष्ठ अधिकृत ओमराज पौडेलले सामाजिक विकासमा पत्रकारिता जगतको महत्वपूर्ण भूमिका हुने भएकाले यसलाई राज्यको महत्वपूर्ण अङ्ग मानिएको बताए ।
 

राससका व्यवस्थापक उत्तम सिलवाल, कार्यकारी सम्पादक एकराज पाठक, नेपाल पत्रकार महासंघका केन्द्रीय सदस्य रुद्र भट्ट, नेपाल प्रेस युनियनका केन्द्रीय सदस्य ऋषिकान्त पौडेललगायतले तालिमका उपलब्धिलाई व्यवहारमा उतार्न सहभागीलाई आग्रह गरेका थिए ।