गोल्डेन न्यूज संवाददाता
नेपालीहरुको महान पर्व विजयादशमीको अवसरमा लायन्स क्लब अफ पोखरा टुरिजम सिटीले आयोजना गर्न लागेको लायन्स नाईट २०७२ को तयारी पुरा भएको छ । नाईटको सम्पूर्ण तयारी पुरा भएको कार्यक्रमका प्रचार–प्रसार संयोजक सन्जय मल्लले बताए ।
कार्यक्रममा गायकहरु बिनोद बानियाँ, धमेन्द्र सेवान र प्रमोद खरेलले सांगीतिक प्रस्तुतिमार्फत मनोरञ्जन दिनेछन भने राष्ट्रिय भलिबल खेलाडी तथा मिस नेपालको उत्कृष्ट ५ प्रतिस्पर्धी नायिका सिपोरा गुरुङ्गको नेतृत्वमा साँस्कृतिक फेशन सो गरिने आयोजकले जनाएको छ ।
कार्यक्रममा पोखरामा रहेका लायन्स क्लबहरु बीच बडा दशैँ, दीपावली, छठ तथा नेपाल संवत ११३६ को शुभकामना आदान–प्रदान तथा लायन्स डिष्ट्रिक्ट ३२५ बि वान नेपालका गर्भनर ध्रुबबहादुर थापालाई सम्मान गरिने क्लबका अध्यक्ष प्रदिप कुँवरले बताए । उनले पोखरा तथा आसपासका लायन्स क्लब ३२५ बि वान नेपालमा आबद्ध क्लबहरु तथा क्लबमा आबद्ध नभएका पोखराका लब्धप्रतिष्ठित ब्यक्तित्वहरु बीच दशैँ शुभकामना, भाइचारा अभिवृद्धि तथा आत्मीय सम्बन्धलाई कायम राख्नका लागि कार्यक्रम आयोजना गर्न लागिएको बताए । अप्ठ्यारो अवस्थामा पनि कार्यक्रम गर्न लागिएको तथा कार्यक्रमबाट बचेको रकम भूकम्प पीडित स्कुलका लागि खर्च गरिने भएकोले कार्यक्रममा पोखरेलीको उत्साहजनक सहभागीता रहनेमा आफू आशावादी रहेको क्लबका प्रथम उपाध्यक्ष कार्यक्रमका सह–संयोजक सुदिप पौडेलले बताए । कार्यक्रम सम्पन्न गर्नका लागि क्लबका अध्यक्ष प्रदिप कुँवरको संयोजकत्वमा १५ समिति कार्यसमिति चयन गरिएको छ ।
Post a Comment