गोल्डेन न्यूज संवाददाता
अनेरास्वियु कास्की क्षेत्र नं. ४ क्षेत्रीय कमिटीद्वारा आयोजित यस वर्षको तेस्रो क्षेत्रीय विद्यालय स्तरीय हाजिरीजवाफ प्रतियोगिता हेमजाको विष्णुपादुका माविमा सम्पन्न भयो । प्रतियोगितकामा प्रमुख अतिथि नेकपा एमाले कास्की जिल्ला सचिव दामोदर वैरागीले उद्घाटन गरेका थिए । प्रमुख अतिथि वैरागीले विद्यार्थीहरुका लागि यस्ता कार्यक्रम सदैव गर्न सकेमा उनीहरुको व्यक्तित्व र नेतृत्व विकासमा थप प्रेरणा मिल्ने बताए ।
प्रतियोगितामा शिक्षासेवीहरु सूर्यप्रसाद तिमिल्सिना र विष्णु कुमारी पौडेललाई कार्यक्रमका प्रमुख अतिथि वैरागीले सम्मान अर्पण गरेका थिए । कार्यक्रममा अनेरास्ववियु कास्की क्षेत्र नं. ४ का पूर्व सचिवालय सदस्य सूर्य पोख्रेल, निजामति सेवामा प्रवेश गरेकोमा सम्मान तथा शुभकामना ज्ञापन गरिएको थियो । प्रतियोगितामा नेकपा एमाले कास्की क्षेत्रनं. ४ का अध्यक्ष विष्णु बहादुर केसी, अनेरास्ववियु पूर्व केन्द्रीय सदस्य सूर्य भण्डारी, त्रिवी जिल्ला कमिटी अध्यक्ष विवेक देवकोटा, भूगोल जिल्ला कमिटी उपाध्यक्ष तथा निवर्तमान अध्यक्ष लक्ष्मण तिमिल्सिना, भूगोल जिल्ला कमिटी सहसचिव शकुन्तला देवकोटा, जीवन पौडेल, कास्की क्षेत्र नं. ४ का विद्यार्थी इन्चार्ज अमित गौतम (माधव) लगायतले शुभेच्छा व्यक्त गरेका थिए । उक्त प्रतियोगितामा १८ वटा विद्यालयका टीमले सहभागिता जनाएका थिए । जसमा कालिका उच्च मावि कास्कीकोट प्रथम, स्नोभ्यू बोर्डिङ स्कुल हेमजा द्वितीय, गौरीशंकर उच्च मावि तृतीय र अम्बिका माविले सान्त्वना स्थान प्राप्त गर्न सफल भएका थिए ।
सो कार्यक्रम अनेरास्ववियु क्षेत्र नं. ४ का संयोजक विवेक त्रिपाठीको सभापतित्वमा सम्पन्न भएको थियो । कार्यक्रमको सञ्चालन क्षेत्र नं. ४ का सचिव प्रेम प्रसाद भट्टराइले गरेका थिए ।
Post a Comment