एकीकृत नेकपा (माओवादी) का अध्यक्ष पुष्पकमल दाहालले संविधान सभाबाट बनेको संविधान कार्यान्वयनका लागि राष्ट्रिय एकताको आवश्यकता औँल्याएका छन् । पार्टी केन्द्रीय कमिटीले आइतबार आयोजना गरेको ‘नेपालको संविधान र कार्यान्वयनका चुनौती’ विषयक अन्तक्र्रिया कार्यक्रमलाई सम्बोधन गर्दै अध्यक्ष दाहालले सो कुरा बताएका हुन् । संविधान बनाउन नदिन कुनै शक्ति लागे पनि त्यो पराजित भएको उनको भनाइ थियो । “संविधान बनाउने काममा अवरोध गर्न नसकेपछि त्यो अदृश्य शक्ति राष्ट्रिय एकताको सरकार बनाउनबाट रोक्ने खेलमा लागेको छ, संविधान बने पनि कार्यान्वयनका लागि राम्रो कानुन बन्न आवश्यक भएकाले कानुन बनाउने बेलासम्म प्रमुख दलका बीच–उनले भने ।
एकताका लागि पार्टीले राष्ट्रपति र प्रधानमन्त्री दुवै पदमा दाबी नगर्ने पनि उनले स्पष्ट पारे । “संविधानअन्तर्गत कानुन बनेर र सङ्घीय संरचना निर्माण भएर कार्यान्वयन नहुँदासम्म राष्ट्रिय एकताको आवश्यकता छ”–उनले भने । संविधान संशोधन भएर परिमार्जन हुँदै जाने भएकाले मधेसका समस्या पनि समाधान गरिँदै जानुपर्नेमा पनि उनले जोड दिएका थिए । उपाध्यक्ष नारायण काजी श्रेष्ठले संविधान सभाबाट संविधान आउनु ऐतिहासिक उपलब्धि र महत्वको विषय भएकाले यसमा सबैले गौरवको अनुभूति गर्नुपर्ने बताए । “संविधानमा पहिलोपटक परराष्ट्र नीति स्वतन्त्र हुने व्यवस्था गरिनु सकारात्मक छ, अपरिवर्तनीय भन्ने केही छैन, यसैले क्रान्तिबाट आवश्यक विषय संशोधन गर्न सकिन्छ, संविधानमा शतप्रतिशत कसैका मुद्दा समावेश हुन नसकेकाले सहमतिको दस्तावेज हो”–उनले भने । समाजवादी परिवार दलका अध्यक्ष प्रेमबहादुर सिंहले सानातिना विषयमा लड्ने प्रवृत्तिको अन्त्य गरी विकास निर्माणका काममा लाग्नुपर्ने बताए । कार्यक्रममा पूर्वसभासद् एवम् महिला अधिकारकर्मी सपना प्रधान मल्ल, प्रा डा सुधा त्रिपाठी, इस्लामी सङ्घका अध्यक्ष मजबुर हुसेन, अलित अधिकारकर्मी पद्म सुन्दास लगायतका वक्ताले संविधानमा सबै वर्गका हकअधिकार समावेश गरिए पनि पूरा नभएकाले संशोधन मार्फत थपिँदै जानुपर्नेमा जोड दिएका थिए ।
Post a Comment