सातौं राष्ट्रिय खेलकुद प्रतियोगिता जारी

गोल्डेन न्यूज संवाददाता

राष्ट्रिय खेलकुद परिषदको आयोजनामा नेपाल पौडी संघद्वारा संचालित सातौं राष्ट्रिय खेलकुद प्रतियोगिता २०७२ अन्तरगत १९ औं राष्ट्रिय पौडी प्रतियोगिताको दोश्रो दिन बिहीबार थप ३ राष्ट्रिय कीर्तिमान कायम भएको छ । सातदोवाटोस्थित पौडी पोखरीमा भएको खेलमा शिरिष गुरुङ्गले ४ सय मिटर फ्रिस्टायल र २ सय मिटर व्यक्तिगत मिड्लेमा थप दुई राष्ट्रिय किर्तिमान कायम गरे । अर्को कीर्तिमान महिला ४ गुणा १०० मिटर फ्रिस्टायल रिलेमा कायम भयो । सेनाका गुरुङ्गले किर्तिमान राख्ने क्रममा ४ सय मिटर फ्रिस्टायलमा ४ मिनेट ३६.७८ सकेन्डको समय निकाले । उक्त दुरीमा उनकै नाममा २०१३ मा काठमाडांैमा भएको दोश्रो एनएसए कपमा ४ मिनट ४७.३८ सेकेन्डको समय थियो । उक्त दुरीमा सेनाकै देवेश मानन्धर र दिपेश चौधरी क्रमशः दोश्रो र तेश्रो भएका थिए । त्यस्तै २ मि. व्यक्तिगत मिड्लेमा उनले २ मिनट २७.०३ सेकेन्डका साथ दुरी पुरा गरे । यस विधामा उनकै नाममा २०१३ मा भएको एनएसए कपमा २ मिनट ३०.२५ सेकेन्डको समय थियो । यस विधामा पनि सेनाकोनै वर्चस्व रह्यो । दोश्रो स्थानमा कृपा कार्की र तेश्रो स्थानमा रुपेश चौधरी रहे । गुरुङ्गले दुई राष्ट्रिय किर्तिमान सहित थप ६ स्वर्ण पदक प्राप्त गरे । उनले प्रतियोगिताको पहिलो दिन १ राष्ट्रिय कीर्तिमान सहित ६ स्वर्ण पदक प्राप्त गरेका थिए । बिहीबारको अर्को कीर्तिमानमा ४ गुणा १०० मिटर रिलेमा मध्यमाञ्चलका जितज्वाली महर्जन, तिषा शाक्य, ओसिना भारती र रसिका पौडेलले ५ मिनट ०८.९४ सेकेन्डको समयमा दुरी पुरा गर्दै कीर्तिमानमा आफ्नो नाम लेखाए । उक्त दुरीमा १९९९ मा काठमाण्डौमा सम्पन्न भएको आठौं साफमा लक्ष्मि, रुविना, रुना र स्तृतीको नाममा ५ मिनेट ०९.५८ सेकेन्डको कीर्तिमान कायम रहेको थियो । प्रतियोगिताको अन्तिम दिन शुक्रबार अपरान्ह ३ बजे पुरस्कार वितरण कार्यक्रम रहेको र प्रतियोगिता २ ः ३० बजे संचालन हुने समेत संघले जानकारी गराएकोछ ।