गोल्डेन न्यूज संवाददाता
नमस्ते सामुदायिक प्रतिष्ठानले पोखरा—१८ बाच्छेबुढुवास्थित वात्सायन बृद्धाश्रमलाई आर्थिक एवं खाद्यान्न सहयोग हस्तान्तरण गरेको छ । बरिष्ठ मानव अधिकारकर्मि टेकनाथ बराल, प्रतिष्ठानका अध्यक्ष गोविन्द शर्मा विखर्ची, सल्लाहकार पदम प्रसाद पौडेल लगायतले बुधबार बृद्धाश्रममा आयोजित एक समारोहका विच उक्त सहयोग हस्तान्तरण गरे । बृद्धाश्रमका कार्यबाहक अध्यक्ष बोधराज कार्कीलाई संयुक्त रुपमा ८५ हजार २ सय १० रुपैयाँको चेक तथा झण्डै ३५ हजार रुपैयाँ बराबरको खाद्यान्न सामग्री सहयोग हस्तान्तरण गरिएको हो । कार्यक्रममा बृद्धाश्रमका कोषाध्यक्ष ललित बानियाँले प्रतिष्ठानको सहयोगप्रति आभार व्यक्त गर्दै बृद्धाश्रमका बारेमा प्रकाश पारेका थिए । प्रतिष्ठानले गएको बैशाखमा पोखरामा सम्पन्न गरेको मनकामना केबलकार सेभेन ए साइड फुटवल च्याम्पियनशिपबाट बचेको रकम मध्ये २० प्रतिशत रकमबाट उक्त सहयोग गरेको हो । सहयोग हस्तान्तरण कार्यक्रममा प्रतिष्ठानका प्रशासकिय अधिकृत एवं खेल संयोजक उत्सब गुरुङ्गले प्रतियोगिताको आय(व्यय बारे जानकारी गराएका थिए ।
Post a Comment