अमेरिकी हेलिकप्टर अझै बेपत्ता

नेपाली सेनाले उद्धारका लागि खटिएको अमेरिकी सेनाको हेलिकप्टर बुधबार साँझसम्म फेला नपरेको जनाएको छ । सेनाका तर्फबाट बहुराष्ट्रिय सेना समन्वय केन्द्र र अप्रेसन संकटमोचनको संयोजन गरिरहेका उपरथी विनोज बस्न्यातले अमेरिकी सेनाको मरिन यूएच वान एन हेलिकप्टर  फेला नपरेको जानकारी दिए । ‘अहिलेसम्म कुनै पनि सम्पर्कको सूचना आएको छैन,’ उनले भने, ’डगुवा र सुनाखानी क्षेत्रमा रहेको अनुमानका आधारमा खोजीकार्य व्यापक बनाएका छौं ।’ हेलिकोप्टरमा दुई जना नेपाली र ६ जना यूएस मरिनको टोली थियो । उनले हेलिकप्टर सम्पर्कविहीन भएको खबर प्राप्त हुनासाथ उक्त क्षेत्रमा भुकम्प पीडितहरुको लागि दोलखा जिल्लाको लापिलाङ, लामिडाँडा, सुनखानी, क्षेत्रपा एवं जुभु ईलाकामा रहेका फौजहरुलाई तुरुन्तै सम्भावित ईलाकाहरुमा परिचालित भई हराइरहेको हेलिकप्टरको खोजी कार्य जारी राखेको बताए ।