मनकामना केवलकार पोखरा कप पुलिसलाई सडन डेथमा थ्रीस्टार क्लव ४–३ गोल अन्तरले पराजित

कास्की जिल्ला फुटबल सघको आयोजनामा सञ्चालित पोखरा कपको चौथो मनकामना केवलकार पोखरा कपको उपाधि नेपाल पुलिस क्लबले जितेको छ । पुलिसे शनिबार पोखरा रंगशालामा भएको फाईनलमा थ्रीस्टारलाई ४–३ गोल अन्तर(सडन डेथ)मा पराजित गदैै उपाधि जितेको हो ।
निर्धारित समयमा १—१ गोलको बराबरीमा टुगिएपछि रेफ्रीले निर्णय पेनाल्टी सुटबाट गरिदिए । पेनाल्टी प्रहारमा थ्रीस्टारका पोखरेली खेलाडी विजय गुरुङ र जगजित श्रेष्ठको प्रहार खेर जादाँ थ्रीस्टार उपाधि विमुखको बाटोमा लम्किएको थियो । किरण चेम्जोङको प्रहारलाई पुलिसका रक्षक रितेश थापाले सेभ गरिदिएपछि उपविजेता बन्दै थ्रीस्टारले दुईलाख १ हजार नगदमा चित्त बुझायो । थ्रीस्टारका लागि विक्रम लामा, निराजन खड्का, सन्तोष साहुखललेको प्रहार मात्रै गोल हुन पुग्यो ।
पुलिसको तर्फबाट पेनाल्टी प्रहार गर्ने क्रममा पोखरेली अजित भण्डारी, निरकुमार राई, सुमन सुवेदी र दिपेन श्रेष्ठलेको प्रहार गोलमा परिणत भएपछि जित पर्याप्त भयो । कप्तान भोला सिलवाल पेनाल्टीमा खलनायक सावित भए । उनीसँगै योगेश श्रेष्ठको प्रहार पनि बाहिरिएको थियो । ४७ औं मिनेटमा विक्रम लामाले पहिलो हाफको दुई मिनेटमा ‘फ्लिक’ हेड गरेको बल सेकेण्ड भित्र छिरेपछि थ्रीस्टारको समर्थकले हुटिङ शुरु गरेका थिए । जगजित श्रेष्ठले हानेको लेफ्ट सट फ्रिकिकलाई लामाले फ्लिक गर्दै बललाई पोष्टको दिशा दिएका हुन् । ५३ औं मिनेटमा निगरानीविहीन अवस्थामा रहेका कप्तान भोला सिलवालले हेडिङ गोल गरेपछि पुलिस एकाएक खेलमा फर्कियो । सिलवाललाई गोलको अवसर भने दिपेन श्रेष्ठले क्रसपास उपलब्ध गराईदिएका थिए ।
 ‘हामीले अपनाएको रणनीति फेल भएन् । तर गोल गर्न हतारिदाँ गोल खान पुग्यौं । प्रेसरलाई कन्ट्रोल गर्दै खेलाडीको मनोबल बढाउन होल्ड गर्न आग्रह गर्दै खेल्यौं । खेलाडीले त्यही अनुसार खेले । बराबरी गोल भएपछि खेलले नयाँ रुप लियो ।’ नेपाल पुलिस क्लबका प्रशिक्षक विराटकृष्ण श्रेष्ठले भने । पाँच मिनेट खेल नियन्त्रण गर्न नसक्दा उपाधिबाट विमुख हुन पुग्यौं । धैर्यता नै देखिएन् । अनुभवी खेलाडीलाई खाली छोड्नुले खेल टर्निङ हुन पुग्यो ।’ थ्रीस्टारका प्रशिक्षक अन्जन केसीले भने । प्रतियोगिताको उत्कृष्ट खेलाडी घोषित भोला सिलवाललाई मोटरसाईकल प्रदान गरियो । स्ट्राईकर सन्तोष साहुखल(थ्रीस्टार), उत्कृष्ट मिडफिल्ड हेमन गुरुङ (पुलिस), उत्कृष्ट गोलकिपर रितेश थापा (पुलिस), उत्कृष्ट प्रशिक्षक विराटकृष्ण श्रेष्ठ (पुलिस), उत्कृष्ट डिफेन्स दिपेन श्रेष्ठ (पुलिस) घोषित भए । उनीहरुलाई नगदसहित ट्रफीबाट सम्मानित गरिएको थियो । प्रतियोगिताको समापन समारोहमै नेपालको फुटबल विकासमा महत्वपूर्ण भूमिका खेल्ने मणि शाह, पोखरेली अग्रज फुटबलर डम्बरलाल माकाजू, सुकबहादुर गुरुङलाई सम्मानित गरिएको थियो । प्रतियोगिताको मुख्य प्रायोजक मनकामना दर्शन प्रालिका अध्यक्ष राजुबावु श्रेष्ठ लगायतले पदक तथा प्रमाणपत्र प्रदान गरेका थिए ।
यसैगरी चौथो संस्करणको मनकामना केबुलकार पोखरा कप फुटवल प्रतियोगिता २०७१ प्रतियोगिता समापनको अवसरमा पूर्व फुटवल खेलाडीहरुलाई सम्मान गरिएको छ । सम्मानित हुनेहरुमा फुटवल प्रशिक्षक मणिविक्रम साह, सुकबहादुर गुरुङ, डम्बरलाल माकाजु र लोकबहादुर रन्जित रहेका छन । उनीहरुले फुटवल खेलको विकासमा उल्लेखनिय योगदान पुराएको भन्दै सम्मान गरिएको आयोजक कास्की जिल्ला फुटवल संघका अध्यक्ष धरम बहादुर लामिछानेले बताए । प्रतियोगिताका मुख्य प्रायोजक मनकामना केवलकार दर्शन प्रालिका प्रवन्ध निर्देशक राजुबाबु श्रेष्ठ, कास्कीका प्रमुख जिल्ला अधिकारी कृष्ण बहादुर राउतले सम्मान पत्रको साथमा दोसल्ला ओढाएर सम्मान गरेका हुन ।