प्रयत्नशिल युवा क्लवको आयोजनामा कास्कीको मौजा–१ मोहोरियामा सञ्चालन हुन लागेको १९औं वार्षिकोत्सव तथा ३९औं बसन्तपञ्चमी मेलाको तयारी पुरा भएको छ । मेला आयोजकले विभिन्न उपसमितिहरु गठन गरि मेलाको तयारी गरेको थियो । सबै उपसमितिहरुले आ–आफ्नों जिम्माको काम पुरा गरिसकेको र मेला प्रारम्भ गर्न मात्रै बाँकि रहेको आयोजक क्लवले जनाएको छ । मेलाको शुक्रबार राष्ट्रिय खेलकुद परिषद्का उपाध्यक्ष तथा नेपाल बास्केटबल संघका अध्यक्ष टेण्डि लामाले उद्घाटन गर्ने क्लवका सल्लाहकार सिम गुरुङ्गले गोल्डेन न्यूज दैनिकलाई जानकारी दिए । गाउँमा आन्तरिक तथा बाह्य पर्यटन प्रवद्धन गर्दै प्रचार प्रसार गर्ने उद्देश्यले आयोजना गर्न लागिएको मेलामा खुल्ला पुरुष भलिबल, छेलो हान्ने, कुर्ची दौड, घैटो फुटाउने, मकै गन्र्ने, बेलुन फुटाई जस्ता प्रतियोगिता संचालन गरिने क्लवका अध्यक्ष मणिराज गुरुङ्गले जानकारी दिए । त्यस्तै मौजामा रहेका विद्यालयहरु वीच हाजिरजवाफ प्रतियोगिता समेत संचालन गरिने उनले बताए ।मेलाको मुख्य आकर्षण पुरुष भलिवल प्रतियोगितामा कास्की र वरपरका विभिन्न १८ टिमले उपाधिका लागि भिडन्त गर्नेछन् । भलिबल प्रतियोगितामा विजेताले १५ हजार र उपविजेताले १० हजार प्राप्त गर्ने छन् । प्रतियोगिताको प्रथम पुरस्कार क्लवका बरिष्ठ सल्लाहकार राम गुरुङ्ग (युके ) ले तथा द्वितिय पुरस्कार क्लवकै बरिष्ठ सल्लाहकार सोम गुरुङ्ग (युएसए )ले प्रायोजन गरेका छन् ।
त्यस्तै मेलाको आकर्षणमा चर्चित लोकदोहोरी कलाकारहरु शर्मिला गुरुङ र शंकर विरही गुरुङको विशेष प्रस्तुति रहने छ भने निरमाया दोहोरी साँझका कलाकारहरु इन्द्रा गुुरुङ्ग, सरिता थापा, रमा राना, टेक क्षेत्री, निश्चल थापा र टस गुरुङ्गको प्रस्तुति रहने छ । ११ गतेसम्म सञ्चालन हुने मेलाको अन्तिम दिन हिमाली साँस्कृतिक परिवार र चर्चित हाँस्य कलाकार दीपक थापाको विशेष प्रस्तुति रहने छ । मेला सम्पन्न गर्न करिव ३ लाख रुपैयाँ लाग्ने क्लवका सल्लाहकार खगेन्द्र गुरुङ्गले बताए ।
गाउँमा भलिबल र बास्केटबल मैदान निर्माणका लागिी देश विदेशमा रहेका ब्यक्तिहरुबाट ११ लाख रुपैयाँ संकलन भैसकेको र सहयोग आउनेक्रम पनि जारी रहेको कोषाध्यक्ष सु. हुमबहादुर गुरुङ्गले बताए ।
Post a Comment