योःमरी पूर्णिमाको अवसरमा शनिबार पोखराको राधाकृष्ण मन्दिर क्षेत्रमा दोश्रो योःमरी तथा नेवारी सांस्कृतिक मेला सम्पन्न भएको छ । पोखरा–१३, कुँडहर ल्याम्ह पुचःको आयोजनामा भएको मेलामा योःमरी तथा नेवारी परिकारका स्टलहरु राखिएका थिए भने आतिथीहरुलाई योःमरी र सगुन प्रदान गरिएको थियो । बाँसुरीको धुनमा योःमरीको पूजा गरेर शुभारम्भ गरिएको उक्त कार्यक्रममा नेवारी गीत तथा नृत्यसहित घोंडेनाच पनि प्रदर्शन गरिएको थियो । लोपोन्मुख नेवारी पर्व योःमरी पूर्णिमाको संरक्षण र प्रवर्धन गर्ने उद्देश्यले महोत्सवको आयोजना गरिएको आयोजकले जनाएको छ । उक्त अवसरमा नेवाः खल कास्कीको अगुवाईमा निर्माण भईरहेको नेवा छेँ भवन निर्माणका लागि ५ लाख सहयोग गर्ने भीमसेनटोल घर भई बुटवल बस्दै आएका मिनबहादुर श्रेष्ठ र उनको धर्मपत्नीलाई सम्मान गरिएको थियो ।
कार्यक्रमको उद्घाटन गर्दै नेवाःखल कास्कीका अध्यक्ष अशोक पालिखेले हरेक जातीले आफ्नो भाषा, धर्म र संस्कृति जोगाउन नितान्त आवश्यक रहेको बताए । आफ्नो भाषा बोल्दा वा संस्कृति मान्दा अन्य समुदायले हाँसिमजाक गरेर उडाउने प्रवृत्ति अन्त्य गरेर बरु अनुसरण गर्नुपर्ने उनको भनाई थियो । नेवाः खल कास्कीका उपाध्यक्ष तथा संस्कृतिविद् तीर्थ श्रेष्ठले अविभाज्य संस्कृति निर्माण गर्ने हो भने कुनैपनि संस्कृतिलाई राष्ट्रिय संस्कृति बनाउनुपर्नेमा जोड दिए । उनले जातीय कुरा र संस्कृतिको आवाज उठाउँदा साम्प्रदायिकताको आरोप लगाउने दुस्साहस कसैले पनि गर्न नहुने तर जातीयताको नाममा कसैले राजनीति पनि गर्न नहुने बताए । कुँडहर पुचःका अध्यक्ष चन्दनमान श्रेष्ठको अध्यक्षतामा भएको कार्यक्रममा प्राध्यापक तारा वराल, समाजसेवी बजिरमान श्रेष्ठ लगायतले आ–आफ्नो भनाइ राखेका थिए ।
Post a Comment