नेपाल सरकारका अर्थमन्त्री एवं नेपाली कांग्रेसका नेता डा. रामशरण महतले आर्थिक समृद्धि र सुधारको बाटोमा देश अगाडि बढिरहेको बताएका छन् । पोखरा उद्योग वाणिज्य संघको आयोजनामा शुरु भएको राष्ट्रिय औद्योगिक व्यापार मेलाको बिहीबार उद्घाटन गर्दै मन्त्री डा. महतले लामो समयसम्म राजनीतिक अस्थिरताका साथै द्वन्द्वले मुलुकको विकास नभएको भएपनि अब विकास अभियानमा सबै लाग्नुपर्नेमा जोड दिए । उनले देश विकासका लागि आर्थिक बहसलाई मूल एजेण्डा बनाउन आवश्यक रहेको बताए । पोखरामा क्षेत्रीय स्तरको अन्तर्राष्ट्रिय विमानस्थल बन्ने प्रक्रिया सुरु भएको बताउँदै उनले पोखराको क्षेत्रको समग्र विकासमा सरकारले विशेषरुपमा ध्यान दिने बताए । उनले पश्चिमाञ्चल क्षेत्रमा विकास निर्माणका ठूला आयोजना बन्ने र क्षेत्रीयस्तरको अन्तर्राष्ट्रिय विमानस्थल, १ सय ४० मेगावाट क्षमताको तनहुँ हाइड्रो, लम्जुङमा ६ सय मेगावाट क्षमताको अपर मस्र्याङ्दी आयोजना, बेनी–जोमसोम सडकलाई कालोपत्रे गर्ने योजना अगाडि बढिरहेको जानकारी दिए । पोखरामा विमानस्थल संगै अन्तर्राष्ट्रियस्तरको क्रिकेट मैदान समेत निर्माण हुने अवस्थामा रहेको भन्दै उनले पर्यटकीय नगरी पोखरालाई स्वास्थ्य, शिक्षा, खेलकुदको शहरका रुपमा विकास गरिनुपर्नेमा जोड दिए । कार्यक्रममा नेपाल उद्योग वाणिज्य महासंघ एवं पोखरा उद्योग वाणिज्य संघका पूर्व अध्यक्ष आनन्दराज मुल्मीले नेपालमा आयोजना हुने मेला तथा महोत्सवले आर्थिक गतिबिधिलाई अगाडि बढाउन सहयोग पु¥याउने बताए । नेपालको अर्थतन्त्रलाई चलायमान बनाउन निजी क्षेत्रको योगदान महत्वपूर्ण हुने उनको भनाइ थियो ।पोखरा उद्योग वाणिज्य संघका अध्यक्ष तथा मेला मूल आयोजक समितिका संयोजक विन्दुकुमार थापाले पोखरामा क्षेत्रीयस्तरको अन्तर्राष्ट्रिय विमानस्थल निर्माण जतिसक्दो छिटो गरिनुपर्नेमा जोड दिए । सबैको सकारात्मक पहलबाट पोखरामा अन्तर्राष्ट्रिय विमानस्थल बन्ने वातावरण बनेकोले भन्दै उनले पोखरामा अन्तर्राष्ट्रिय विमानस्थल बनाउने प्रक्रिया सरकारले अगाडि बढाएको स्पष्ट पार्दै छिट्टै विमानस्थलको शिलान्यास गर्न सरकारसँग आग्रह गरे । कार्यक्रममा संविधानसभा सदस्य रवीन्द्र अधिकारीले पोखरा विश्वमै पर्यटकीय गन्तव्यका रुपमा परिचित बनेको बताउँदै सबै मिलेर पोखराको विकास गरिनुपर्नेमा जोड दिए । नेपाली कांग्रेस कास्कीका सभापति एवं सभासद यज्ञबहादुर थापाले कास्कीको समग्र विकासका लागि व्यापार मेलाले महत्वपूर्ण योगदान पु¥याउने भन्दै पोखरालाई लगानीको क्षेत्रका रुपमा विकसित गरिनुपर्नेमा जोड दिए । मेलाको उद्घाटनका अवसरमा पोखराका योजनाकारद्वय शंकरराज पाठक र पदमबहादुर क्षेत्रीलाई सम्मान समेत गरिएको थियो । त्यस अवसरमा संविधानसभास सदस्य शारदा पौडेल, सीता गिरी वली, सरकारका आर्थिक सल्लाहकार चिरञ्जीवि नेपाल, संघका प्रथम उपाध्यक्ष देव क्षेत्री, महासचिव रविन्द्रबहादुर प्रजू लगायतले आ–आफ्नो भनाइ राखेका थिए । बिहीबारबाट शुरु भएको मेला १४ गतेसम्म संचालन हुनेछ । स्थानीय कला र संस्कृतिको प्रदर्शनी लगायत दैनिक उपभोग्य वस्तु घरायसी सरसामान, लत्ताकपडा, श्रृंगारका सामान मेलाका आकर्षण बन्ने संघका महासचिव तथा मेलाका प्रचार–प्रसार संयोजक रविन्द्रबहादुर प्रजुले बताए ।
मोवाइल टेलिफोनको अर्को सेवा प्रदायक कम्पनी हेलो नेपालले बिहीबारदेखि पश्चिमाञ्चल विकास क्षेत्रमा पनि आफ्नो सेवा शुरु गरेको छ । मध्यपश्चिमाञ्चलका १५ जिल्लामा सेवा शुरु गरि हाल सुदूर पश्चिमाञ्चल र पश्चिमाञ्चल विकास क्षेत्रमा आफ्नो सेवा विस्तार गरेको हेलो नेपाल छुट्टै जिएसएम अपरेटर हो । पोखरामा बिहीबारदेखि शुरु भएको राष्ट्रिय औद्योगिक व्यापार मेलाको अवसर पारेर हेलो नेपालले आफ्नो सेवा शुरु गरेको जनाएको छ । सेवाको शुभारम्भको अवसरमा तीनवटा सिमकार्डमा तीन महिनासम्म निःशुल्क कुराकानी गर्न सकिने र त्यसपछि हरेक महिना ३ सय मिनट कल र ३ सयवटा एसएमएस निःशुल्क पठाउन सकिने व्यवस्था हेलो नेपालले गरेको छ । हाल सिमकार्ड लिनका लागि निश्चित शुल्क तिर्नुपर्ने भएपनि यहि मंसिर ६ गते शनिबार भने मेलामा जाने दर्शकका लागि हेलो नेपालको सिमकार्ड सित्तैमा उपलव्ध गराइने भएको छ । अर्थमन्त्री डा. रामशरण महतले आफ्नो उद्घाटन मन्तव्यमा हेलो नेपालले सेवा विस्तार गरेकोमा बधाई दिंदै सफलताको शुभकामना प्रकट गरेका थिए ।
Post a Comment