जिल्ला विकास समिति कास्कीबाट आगामी बर्ष २०७२÷७३ को बार्षिक योजना तर्जुमाका लागि गरिएको पूर्व योजना तर्जुमा गोष्ठी ६ बुँदे निर्णय गरी सकिएको छ । सोमबारेदेखि जिल्ला विकास समितिको सभाहलमा भएको गोष्ठीमा जिल्ला विकास समिति कास्कीको दीर्घकालिन नारा परिवर्तन गर्ने निर्णय भएको छ । जिल्ला विकासका लागि सबैभन्दा पहिले दीर्घकालीन सोच लिनुपर्ने र सोही अनुसार कार्यक्रम कार्यान्वयन गर्न सके छिटो विकास हुने भएकाले नारालाई परिवर्तन गरिएको राजनीतिक दलका प्रतिनिधिहरुले बताएका छन् । यसअघि भएको कृषि, पर्यटन, रोजगार र पूर्वाधार ः कास्की विकासका चार आधारलाई परिबर्तन गरी कृषि, पर्यटन, जलश्रोत र पूर्वाधार ः समृद्ध कास्कीको चार आधार भन्ने नारा तय गरिएको हो । जिल्लामा पूर्वाधार विकास र विस्तार भएपछि रोजगार आँफै सिर्जना हुने भएकाले नारामा रोजगारलाई राख्नु उचित नहुने कार्यक्रमका सहभागीहरुले सुझाव दिएका थिए । सहभागीहरुकै सुझावको आधारमा नारा परिबर्तन गरिएको जिल्ला विकास समिति कास्कीका योजना अनुगमन तथा प्रशासकीय अधिकृत कीर्तनराज पौडेलले बताए । योसँगै आगामी बर्षका लागि प्रस्तावित बजेट र गोष्ठीमा आएका सुझाव समेटी विभिन्न सरकारी तथा गैर सरकारी संस्थाहरुलाई पठाउने, योजना छनौटका आधार र भारलाई १० वटा शिर्षकमा विभाजन गर्ने, योजना तर्जुमा प्रक्रियाको सहजीकरणका लागि योजना तर्जुमा सहजीकरण टोली गठन गर्ने, आगामी माघ ५ गतेदेखि १२ गतेसम्म सबै ईलाकाहरुको ईलाका स्तरीय गोष्ठी सम्पन्न गर्ने निर्णय पनि गोष्ठीमा गरिएको छ । गोष्ठीमा आगामी बर्षदेखि बार्षिक रुपमा एउटा योजना सम्पन्न गर्ने नीति अवलम्बन गर्न पनि सुझाव दिएको थियो । जसमा आगामी बर्षका लागि एक घर एक धारा कार्यक्रमलाई अभियानका रुपमा सञ्चालन गर्ने र सकेसम्म एक बर्षभित्रै सम्पन्न गर्ने प्रश्ताव अघि सारिएको छ । आगामी बर्ष सडकको नयाँ ट्रयाक खन्ने काम भने पूर्ण रुपमा अन्त्य गर्न पनि प्रस्ताव गरिएको छ । जिल्लाका सबै गाविस भवनसम्म सडक सञ्जाल पुगिसकेकाले अव नयाँ सडक नखन्ने र भएका सडकलाई बाह्रैमास सञ्चालन गर्ने गरि स्तरोन्नती गर्ने प्रश्ताव गरिएको हो । यस्तै, अवण्डा बजेट नराख्न, क्रमागत योजनाको भार कम गर्न, २ लाख भन्दा साना योजना गाविसबाट सञ्चालन गर्न, छिटो लाभ दिने खालका योजनामा बजेट विनियोजन गर्न पनि सहभागीहरुले सुझाव दिएका छन् ।जिल्ला विकास समिति कास्कीका लेखा अधिकृत हरि पंगेनीलाई मंगलबार बिदाई गरिएको छ । बुधबारदेखि सिञ्चाईँ मन्त्रालयमा काम गर्नेगरि सरुवा भएका अधिकृत पंगेनीको मंगलबार जिल्ला विकास समितिमा एक कार्यक्रमको आयोजना गरी बिदाई गरिएको हो । पंगेनी २०६९ जेठ १ गते कास्की जिविसमा लेखा अधिकृतको रुपमा आएका थिए । अहिले कास्की जिविसको लेखा अधिकृतमा जयराम पौडेल आउनुभएको छ । जिल्ला प्राविधिक कार्यालयको लेखा शाखामा १२ बर्षदेखि निरन्तर काम गरेका भेषराज पौडेलको पनि मंगलबार बिदाई गरिएको छ । यसैगरी जिविसको उर्जा तथा बातावरण शाखामा आएका उर्जा तथा वातावरण अधिकृत आशिषमणि लामिछानेलाई स्वागत गरिएको छ । विदाई कार्यक्रममा पंगेनीले आफूले आफ्नो कार्यकालमा राम्रा कामको सुरुवात गरेपनि केही कामहरु गर्न नसकेको बताए । उनले आफ्नो कार्यकालमा आन्तरिक श्रोतको उल्लेख्य बृद्धी गर्न सकेको, भुक्तानी दिने ब्यवस्थालाई प्रविधिमैत्री बनाउन सकेको र सामाजिक सुरक्षा भत्तामा पेश्कीमाथि पेश्की दिने व्यवस्थालाई निरुत्साहित गरेको बताए । यस्तै कास्कीमा साना योजना माग गर्ने क्रमलाई निरुत्साहित गर्न चाहेपनि नसकेको र उपभोक्ता समितिलाई पेश्की शून्य बनाउन नसकेको बताए । कार्यक्रममा कास्कीका स्थानीय विकास अधिकारी तारानाथ अधिकारीले पंगेनीले आफ्नो कार्यकालमा राम्रो कामको सुरुवात गरेका र त्यसलाई अझै निरन्तरता दिने प्रतिबद्धता जनाए ।
Post a Comment