सिद्धार्थ सहकारीको १५औं साधारणसभा

पोखरा उपमहानगरपालिका वडा नं. १२ शितलादेवीमा रहेको सिद्धार्थ सहकारी संस्था लिमिटेडको  १५औं वार्षिक साधारणसभा हालै  सम्पन्न भएको छ । साधारणसभाको उद्घाटन गर्दै प्रमुख अतिथि जिल्ला सहकारी संघ कास्कीका अध्यक्ष प्रभा कोइरालाले नेपालको आर्थिक विकासमा सहकारीको भूमिका महत्वपूर्ण रहेको बताइन् । उनले पछिल्लो क्रममा सहकारी संस्थाको संख्या वृद्धि भएसंगै विकृति बढ्दै गएकोमा चिन्ता व्यक्त गर्दै सहकारीको संख्यामा भन्दा गुणस्तर विकासमा ध्यान दिनुपर्नेमा जोड दिइन । जिल्ला बचत तथा ऋण सहकारी संघका अध्यक्ष भीम गुरुङले  संस्थाले  गरेका गतिविधिको  प्रशंसा गर्दै आर्थिक सम्बृद्धि गर्ने कार्यमा हातेमालो गर्न तयार रहेको  बताए । कार्यक्रममा सहकारीका अध्यक्ष तीर्थलाल श्रेष्ठले  आगामी कार्य योजना, सचिव सुरेशबहादुर श्रेष्ठले  सचिवको प्रतिवेदन र कोषाध्यक्ष बिष्णुबहादुर श्रेष्ठले कोषाध्यक्षको  प्रतिवेदन पेश गरेका थिए । यस्तै, ऋण संयोजक निर्मला श्रेष्ठले र काम परिचालन प्रतिवेदन,  गोविन्द प्रसाद सिग्देलले लेखा समितिको प्रतिवेदन र आर्थिक सल्लाहकार ज्ञानबहादुर कार्कीले  आ–आफ्नो प्रतिवेदन पेश गरेका थिए । सहकारीका अध्यक्ष तीर्थलाल श्रेष्ठको अध्यक्षतामा भएको  कार्यक्रममा उपाध्यक्ष गोकर्ण  कार्कीले स्वागत र सञ्चालन सचिव सुरेशबहादुर  श्रेष्ठले गरेका थिए भने शेयर सदस्यहरु विश्वलाल श्रेष्ठ र विनिता दाहालले सहकारीको बारेमा आ–आफ्नो भनाई राखेका थिए । त्यस अवसरमा संस्थाका शेयर सदस्यहरुका ११ जना छोराछोरीहरुलाई एसएलसीमा उत्तीर्ण भएकोमा सम्मान गरिएको थियो भने २१ जना नयाँ शेयर सदस्यलाई प्रमाणपत्र वितरण गरिएको थियो ।