नेतृत्व चयनको चर्चाले तात्दैछ नेपाल प्रेस युनियनको केन्द्रीय महाधिवेशन

प्रजातन्त्रवादी पत्रकारहरूको छाता सङ्गठन नेपाल प्रेस युनियनको आठौँ राष्टिूय महाधिवेशनको मिति नजिकिँदै गर्दा महाधिवेशनमा प्रस्तुत हुने प्रस्ताव र नयाँ नेतृत्व चयनको विषयले महाधिवेशनको सरगर्मी बढाएको छ । व्यावसायिक पत्रकारिताको विकासका लागि प्रेस स्वतन्त्रताको प्रत्याभूति तथा श्रमजीवी पत्रकार सम्बन्धी कानुन कार्यान्वनय जस्ता विषय पेचिलो बनेको वर्तमान अवस्थामा हुन लागेको महाधिवेशन मूलतः समग्र पत्रकारको हकहितको सुरक्षामा केन्द्रित हुनुपर्ने आवाज उठेको छ ।     व्यावसायिक पत्रकारिता, सङ्गठन सुदृढीकरण, शुद्धीकरण, निर्माण तथा समयानुकूल परिवर्तन र पत्रकारको वृत्ति विकास, समयानुकूल सञ्चारसम्बन्धी कानुन र नीतिबारे विज्ञ र सरोकारवालाबीच बहस गरेर अघि बढ्नुपर्ने अवस्था रहेको छ ।     तर महाधिवेशनको चर्चासँगै पत्रकारिता र सञ्चार क्षेत्रका जल्दाबल्दा विषयभन्दा चुनावी सरगर्मीले बढी महत्व पाएको महसुस गरिएको छ । नेतृत्वमा विजयी हुन चर्चामा रहेका उम्मेदवारहरूले मतदाताहरू सँगको भेटघाट, सम्पर्क र कुराकानीलाई तीव्र बनाएका छन् । पार्षद् भेट्न जिल्ला दौडाहाको अतिरिक्त फेसबुक, ट्वीटर, इमेलजस्ता सामाजिक सञ्जालको प्रयोगले चुनावी माहोललाई तताएको प्रष्ट देख्न पाइन्छ भने इमेल, मोबाइल सन्देश र फोन सम्पर्कको क्रम पनि निकै बढेको छ ।
स्थापनाकालको प्रारम्भमा ४० मात्र सदस्य रहेको युनियनमा हाल करिब पाँच हजारभन्दा बढी साधारण सदस्य आबद्ध छन् । आगामी भदौ २१ र २२ गते हुन गइरहेको प्रेस युनियनको आठौँ राष्ट्रिय महाधिवेशन कास्की जिल्लाको पोखरामा हुँदैछ । यसअघि प्रेस युनियनको सातौँ राष्ट्रिय महाधिवेशन सुनसरी जिल्लाको इटहरीमा भएको थियो । प्रत्येक तीन वर्षमा हुने महाधिवेशनले नेतृत्वसमेत चयन गर्दै आएको छ । इटहरीमा सम्पन्न सातौँ राष्टिूय महाधिवेशनबाट पत्रकार किरण पोखरेलको नेतृत्वमा ६१ सदस्य कार्यसमिति निर्विरोध निर्वाचित भएको थियो ।
निवर्तमान अध्यक्ष पोखरेलले नेपाल पत्रकार महासङ्घको निर्वाचनमा प्रजातन्त्रवादी पत्रकार पोषण केसीको नेतृत्वलाई विजयी गराउन नसकेको भन्दै नैतिकताका आधारमा आफ्नो पदबाट राजीनामा दिएका थिए । पोखरेलको राजीनामा लगत्तै वरिष्ठ उपाध्यक्ष बद्री सिग्देलले कार्यबाहक अध्यक्षको भूमिका निर्वाह गर्दै आएका छन् । यसअघि वरिष्ठ उपाध्यक्ष रहेका सिग्देल प्रजातान्त्रिक प्रक्रियाबाट प्रेस युनियनको नेतृत्वलाई स्थापित गराउन कम्मर कसेर लागेकोे बताइन्छ ।       वरिष्ठ उपाध्यक्ष सिग्देल, उपाध्यक्ष गङ्गाधर पराजुली, महासचिव शिव लम्साल, पूर्व वरिष्ठ उपाध्यक्ष दामोदर दवाडी, पूर्व कोषाध्यक्ष जुनारबाबु बस्नेत, भुवन भट्ट, बिन्दुकान्त घिमिरेले अध्यक्ष पदमा उम्मेदवारी दिने चर्चा रहेको छ । तत्कालीन प्रधानमन्त्री स्व. गिरिजाप्रसाद कोइरालाका प्रेस सल्लाहकार रहेका जयप्रकाशप्रसाद गुप्ताको संयोजकत्वमा २०४८ सालमा युनियनको गठन भएको हो । यसअघि युनियनको अध्यक्षमा क्रमशः हरि अधिकारी, तारा बराल, रमेश तूफान, कुलचन्द्र वाग्ले, मुरारीकुमार शर्मा, समीरजङ्ग शाह र आठौँमा किरण पोखरेलले नेतृत्व गरिसकेका छन् ।
पोखरामा हुने महाधिवेशनबाट कसलाई निर्वाचित गर्ने हो त्यो भविष्यकै गर्भमा रहे पनि युनियनमा आबद्ध अधिकांश पत्रकारहरू प्रजातान्त्रिक पद्धतिअनुसार निर्वाचन गर्नुपर्ने पक्षमा जुटेका छन् । तथापि युनियनको इतिहासमा हालसम्म दुईपटक मात्र निर्वाचन भएको छ भने सातवटा महाधिवेशनबाट नेतृत्व निर्विरोध चयन भएको छ ।  पाल्पामा सम्पन्न तेस्रो महाधिवेशन र सिरहाको लहानमा सम्पन्न पाचौँ अधिवेशनबाट मात्र प्रजातान्त्रिक पद्धतिअनुसार नेतृत्व निर्वाचित भएको थियो जसको नेतृत्व तारा बराल र कुलचन्द्र वाग्लेले गरेका थिए । युनियनको पहिलो राष्ट्रिय महाधिवेशन काठमाडौँ, दोस्रो वीरगन्ज, तेस्रो पाल्पा, चौथो दाङ, पाँचाँै, लहान, छैठौँ पोखरा र सातौँ इटहरीमा सम्पन्न भएको थियो । आठौँ राष्ट्रिय महाधिवेशन पोखरामा हुँदैछ । चौथो राष्ट्रिय महाधिवेशन दाङमा सम्पन्न भए पनि निर्वाचन भने सुनसरीको इटहरीमा भएको थियो ।  स्थापनाकालको २३ वर्षपछि हुन गइरहेको यस अधिवेशनमा करिब एक हजार १०० सदस्यले निर्वाचन प्रक्रियामा भाग लिने जानकारी सुदूर पश्चिमाञ्चल संयोजक भीष्म ओझाले दिए । युनियनको विधान २०४८ ले युनियनको गठनमा कुल ६१ सदस्य निर्वाचन हुने व्यवस्था गरेको थियो । यो विधान चौथोपटक २०६७ सालमा संशोधन भएको थियो । आठौँ राष्टिूय महाधिवेशनको आयोजना गर्ने सौभाग्य कास्की जिल्लाले प्राप्त गरेको छ । आठौँ राष्ट्रिय महाधिवेशनले आगामी तीन वर्षे कार्यकालको नेतृत्व चयन गर्ने छ । यसअघिको विधानलाई समयानुकूल परिवर्तन गर्ने सोच रहेको कार्यबाहक अध्यक्ष सिग्देलले बताए । कार्यबाहक अध्यक्ष सिग्देलले ६१ सदस्यीय कार्यसमिति लाई घटाएर ५१ कार्यसमिति बनाउने तयारीमा युनियन जुटेको पनि जानकारी दिए ।